阿史之前講咗幾個同清代雍正皇帝嘅故事，講到呢度自然唔可以唔提民間傳說中同佢有關嘅血滴子。
响民間故事中，雍正帝擁有一班刺客手下，專門作刺探同執行暗殺任務，用嘅武器就係血滴子，甚至有話呂四娘就係用血滴子割咗雍正個頭。呢啲故事阿史响小學時已經睇電視劇知道，咁其實係點呢？事實就係血滴子呢樣嘢响正史上係無記載過，甚至對於血滴子係乜都有唔同嘅講法。唔少人都認為呢樣係一個暗殺用武器，一個圓形帽狀鐵器內有鋸齒，末端就連住鍊繩，旋轉飛擲去目標頭上就可以取人首級。而另一個講法就係血滴子只係一個代號，係指雍正帝所豢養以誅鋤異己嘅刺客。呢班人駐紥响京城嘅雍和宮，叫做「粘竿處」，表面係幫雍正執頭執尾，實際就係一班特務，而呢種「血滴子」响幾年前內地電視劇《甄嬛傳》出現過，去執行雍正帝偷取王子血液作認親用嘅任務。不過，呢啲都係只係後世流傳之說，無人知道歷史上係咪真係存在過血滴子。
講開又講，每當提到血滴子，阿史總會唔覺意响前面加上「忌廉」二字。
原圖：電影《整蠱專家》劇照