喺古代醫療科技同生活環境都唔太好嘅情況下,可以活到六十、七十歲已經算係相當難得,而對當時嘅人嚟講都真係一件喜事!喺清朝,康熙就出名敬老,喺康熙五十二年之時,正正就係佢六十大壽之時。
喺古代可以活到六十歲已經係相當難得,更何況佢身為皇帝自然就要風風光光咁慶祝。得知呢個消息後,全國嘅百姓以及一啲上咗年紀、都係花甲之年嘅老人家就浩浩蕩蕩咁向京城出發,呢啲百姓甚至係嚟自雲南、廣州等地,歷時要一到兩個月先可以到達京城。
得知呢啲為自己賀壽嘅老人家咁有心,康熙就下旨要優待佢哋,由衣食住行再去到醫療都為佢哋通通準備,最終喺生日果幾日,由西直門去到暢春園就準備咗接近20裡嘅宴席,亦即係「千叟宴」。「千叟宴」上唔單止有四千幾個七十歲以上嘅老者,就連九十歲嘅都有三十幾人,真係誇張!
而擺完六十大壽之後,去到康熙六十一年,當時已經六十九歲嘅康熙就想為自己古稀之年再擺一次「千叟宴」,當時年僅十二歲嘅弘曆就一度見到佢嘅「皇爺爺」有幾風光。
時間去到乾隆六十年,已經八十五歲嘅乾隆選擇禪位,正式成為太上皇。但呢個時候佢就再辦千叟宴,但呢度就有個唔同嘅要求,參加嘅「老者」要七十歲先至符合資格,但仍然有三千幾人參加。
眼見當時咁多老人都前來為自己賀壽,當時乾隆係心花恕放,但其實無論係康熙定係乾隆呢一次就接連有唔少老人返到屋企都抱病離世,原因大概係普通百姓平民居多,一嚟食唔慣大魚大肉,二嚟出入京師真係路途遙遠車馬勞頓,結果賀壽就連條命都冇埋。
原圖嚟自網絡