家雞，今時今日已經成為唔同國家人民嘅日常食用動物，之不過史友們又有冇諗過最初家雞並唔係為食用而養，而佢哋生活嘅地方亦都唔係喺地面，而喺係樹上呢？今次阿史就同大家講一講啦！
近日英國考古學期刊Antiquity就刊登咗一項最新研究，當中就講到一項關於家雞嘅研究改變咗唔少現今對家雞嘅歷史同概念。首先由起源開始講起，家雞對唔少國家而言都係外來物種，研究團隊就對89個國家、600多個地點發現雞遺骸嘅地點進行重新評估，結果就發現新石器時代泰國中部旱稻種植地「Ban Non Wat」所出土嘅雞骨頭係最古老，可以追溯到公元前1650年至公元前1250年，所以泰國係極有可能係家雞起源地，而家雞祖先可能係受到稻米誘惑而從樹上落來。
而更重要一點就係，家雞最初並唔係為咗食用而養，喺唔少挖出古老家雞遺骨嘅地點，成年雞隻嘅雞頭係被放置喺人類墳墓當中，反映當時社會視之為神聖又或者有特殊意義嘅存在，而部份雞骨遺骸甚至仲以放射性碳定年法測出有二十幾歲。
直到近3000年前，家雞就被馴化，先後到達中國中部、南亞、美索不達米亞社會等，同時亦都反映旱稻農業喺當時世界嘅發展，真係有意思！
原圖嚟自網絡