今時今日資訊科技發達，大家時時刻刻都可以留意到世界發生咩，但喺古代要做到呢件事就唔係咁容易，分分鐘就係因為呢一點而改變一個國家嘅國運，今次阿史就想同大家講講乾隆皇帝所寫嘅一封信。
喺1792年，英國首個派到中國首個使團馬戛爾尼使團就出使中國，當時佢哋係有幾個目標希望達成，分別係開放更多貿易口岸、放寬對英國商人貿易限制、甚至仲希望清朝可以讓出領土畀英商居留等等。
而喺乾隆五十七年農曆十月，英國商人波朗、亞免、質臣等來廣州，當時佢哋就以奉國王佐治三世命「因前年大皇帝萬壽未申祝厘，今遣使臣馬加爾尼等將由天津入貢」，希望咁樣可以通過廣東總督轉奏乾隆帝，而結果乾隆帝真係諭「准其所請」。
使團進入天津、離大沽赴北京，期間就已經同中國禮部官員發生多次禮儀爭執，甚至馬戛爾尼自己都因為「雙膝下跪、三叩九拜」嘅規矩而差啲見唔到乾隆，最終就以單膝下跪禮數妥協。而當佢見到乾隆後，本來以為可以達成所有目的嘅馬戛爾尼就提出所有條件，結果全數都被乾隆一口回絕，更加表明「皆系更張定制，不便准行」，冇幾耐仲被乾隆下逐客令。
喺馬戛爾尼使團離開之前，乾隆就好畀面咁寫咗一封信《敕英咭利國王諭》，信中除咗提到呢次清朝嘅賞賜之外，仲講到乾隆自己體會到英國國王嘅「恭順之誠」，雖然佢哋提出嘅要求同天朝體制不合，但如喜歡中國瓷器、絲綢，自己都係可以每年賞賜一啲畀英國嘅。
信中完全就係將當時完成工業革命嘅英國當成一般藩屬國，呢封信以及乾隆嘅決定亦都令到大清後來閉關鎖國，徹底走向滅亡。
原圖嚟自網絡