如果提起我國近代最早期嘅大學，可能唔少史友都知道會係上海聖約翰書院、北洋大學堂等等，但如果講到世界上最早嘅大學，史友們又知唔知係邊一間呢？今次阿史就同大家介紹下稷下學宮啦！
稷下學宮可能大家都未必聽過呢個名，但其實佢正係世上最早嘅官辦高等學府，係政府嘅智庫！稷下學宮係由齊桓公所建，而喺佢之後亦都有齊國威王、宣王對稷下學宮加以發展。喺一百多年時間入面，稷下學宮去到齊泯王時期就已經成為齊國重要嘅人才來源，入面嘅學者亦都人才濟濟。
稷下學宮嘅存在，促使咗中國學術思想史嘅驚人現象，當時稷下學宮係容納咗「諸子百家」幾乎全部學派，由儒、法、名、兵、農各家都有，全盛時期嘅賢士多達千人，孟子、荀子、申子、接子、季真都曾經喺稷下學宮。
稷下學宮嘅出現令到齊國強大，而當時呢班學者其實都已經知道咁樣會引嚟諸國聯盟對付，但當時齊泯王並冇聽取勸告，呢個舉動亦都令唔少學者離開學官。而去到齊泯王十七年，秦、燕、趙、韓、魏五國聯盟攻入齊國都城臨淄，稷下學宮一度被迫中止運行。雖然齊襄王復國之後想重建稷下學宮，但學宮就早已經一蹶不振。
原圖嚟自網絡