呢排我國嘅第三艘航母正式命名下水，令到唔少網友都感嘆我國嘅國力終於都強大起嚟，唔再受外國嘅欺壓。而提起呢一一段屈辱嘅歷史，阿史就想同大家講多啲當時挺身而出嘅英雄人物，今次就介紹一下抗日飛行員陳懷民。

陳懷民係江蘇鎮江人，本名陳天民嘅佢，喺參軍之後改名陳懷民，寓意可以做到愛國懷民。喺1932年「一二八事變」後，佢毅然決定投筆從戎，以學生義勇軍嘅身份喺上海吳淞一帶抗擊日本侵略者。

去到1933年，佢就加入杭州筧橋中央航空學校並喺1936年畢業後，被編入中國空軍第四大隊任少尉飛行員，先後參與過保衞華北、捍衞上海、南京嘅空戰。咁點解呢位飛行員會咁出名呢？

原來先喺1937年9月，喺日軍出動300架戰機空襲南京之時，佢駕駛住駛2405號戰機擊落敵機1架，擊傷4架，雖然身受重傷但仍然可以跳傘成功。喺1938年4月28日激戰之前，佢特意返到屋企探望父母並且寫下遺言：「打仗就有犧牲，説不定哪一天，我的飛機被日機擊落，如果真的出現了那種事情，你們不要悲傷，也不要難過。我是為國家和廣大老百姓而死，死得有價值。如果我犧牲了，切望父母節哀，也希望哥哥、姐姐、弟弟、妹妹繼續投身抗日，直到把日本侵略者趕出中國。」

而呢段「遺言」不幸地亦都成真，喺1938年4月29日，侵華日軍海軍出動飛機36架空襲武漢，陳懷民奉命與戰友們駕機迎敵，佢先係接連擊落幾架敵機，並且以一敵五放棄求生機會向敵機衝去，最後以身殉國。

原圖嚟自網絡