幾年前响電影《我和我的祖國》入面，記得好多角色都講過「一秒鐘都不能等」，即係香港回歸祖國儀式中一定要响零時零分升旗，而呢段歷史原來係有段小插曲。
中英兩國代表响1997年回歸前就政權交接儀式上曾有「一秒鐘」嘅激烈爭議。當時英方將降英國國旗同演奏英國國歌持續至六月三十日最後一秒先結束，要求中方推遲一秒，即七月一日零時零分一秒才開始升中國國旗同演奏中國國歌。而當時中方代表就堅持反對，軍樂團當時仲接到命令：「不能早一秒，也不能晚一秒。」如果英方故意拖延時間，只要時間一到就準時奏響國歌，即使雙方國歌音樂重疊都在所不惜。
到咗當晚二十三點五十九分，英國方面開始演奏《上帝保佑女王》，降英國國旗。唔知係時間關係，原本要五十幾秒完成嘅英國國歌，用咗三十幾秒就完成，而中國方面亦順利於七月一日零時零分零秒奏起《義勇軍進行曲》同埋升起五星紅旗。