近排阿史就收到史友們嘅訊息,就話想阿史講下一位香港歷史人物,就話佢唔單止「現身」英國寄宿學校,甚至佢嘅一生都係被「低估」咗。咁到底呢位歷史人物係邊個,又曾經做過咩事呢?阿史今次就同大家講一講啦!
首先,呢位現身喺英國寄宿學校歷史檔案室嘅歷史人物就係叫做曹善允,出生喺1868年嘅佢年幼時就先後喺上海以及英國受教,並且仲考入過當時英格蘭車特咸學院修讀法律。喺呢間中學畢業之後,喺未有大學法律學位情況下,曹善允就憑住自己優異嘅成績進入律師行實習,成為首位英格蘭與威爾斯律師公會正式會員兼英國執業律師嘅香港人。
佢嘅成就當然唔止咁簡單,佢喺1897年就選擇返到香港發展,好快就受到香港最高法院認可為執業事務律師,展開經營律師樓業務。喺經營律師樓嘅同時,佢亦都選擇同何啟爵士與區德進行九龍填海造地建屋,最後「啟德濱」填海計劃喺曹善允主持下,首期亦都喺1920年完成。
受到父親影響、明白知識重要嘅佢,亦都積極喺香港參與公共事務,今時今日嘅香港大學、聖士提反書院、聖士提反女子中學、民生書院、金文泰中學都係由佢有份倡建,甚至曹善允仲涉足唔少早期華人醫療服務,真係相當有善心!