提起古代嘅一啲官職名稱，相信唔少史友都會諗起「知縣」、「縣令」呢兩個官職，甚至仲因為呢兩個官職名相當相似，仲可能會誤會佢哋其實係同一個官職。咁到底「知縣」同「縣令」又相差幾遠呢？今次阿史就同大家講一講啦！
「知縣」同「縣令」呢兩個官職雖然只有一字之差，但其實兩位官員嘅級別絕對係好唔同！「縣令」呢個官職最早係出現喺戰國時期，由於當時嘅諸侯國都係以縣作為一個行政單位，所以一個萬人以上縣嘅話事人自然就係叫做「縣令」，少於萬人就係叫做「縣長」。
至於「知縣」呢個官職就係喺唐朝先至出現，「知縣」同「縣令」呢個官職其實喺當時係同時存在，喺職能上嚟講兩者係冇乜分別，只係「縣令」係正式工，而「知縣」就只係負責輔佐縣令嘅官員代理政務，亦即係臨時工咁解。
而去到宋朝，雖然「知縣」同「縣令」兩個官職都仲存在，兩者仍然係正式以及臨時工嘅分別，但呢個時候「知縣」多數都係由朝廷派遣，所以地位亦都即時改變咗，去到後來甚至「縣令」一職更被廢除，真係估佢唔到！
原圖嚟自網絡