提起蔣介石、張學良呢兩個名,想必史友會都會諗起中國近代史上嘅一件大事,就係「西安事變」喇!雖然喺「西安事變」發動後,的確令到全民族都目標一致咁抗日,但發生呢場兵諫嘅楊虎城、張學良下場就冇咁好喇!
楊虎城喺「西安事變」被迫出洋「考察」,最終喺1949年9月6日被殺,至於張學良就足足被囚禁54年,而據講喺呢54年光景當中,佢曾經三次求蔣介石放過自己,但蔣介石即使臨終之時仍然吩咐蔣經國此人不能放!
喺抗戰爆發後,張學良其實就曾經托戴笠轉交一封信以及一支釣魚竿畀蔣介石,希望佢可以畀自己帶兵抗日。戴笠唔明白釣魚竿嘅用意,但蔣介石就知道張學良想自己畀佢政治權力嘅魚竿,亦即係想重獲自由。結果,呢個請求就當然係失敗啦!
而喺抗戰勝利後,有人提議蔣介石放返張學良,畀佢重返東北從事軍政工作,而張學良呢個時候就送咗一隻瑞士錶畀蔣介石,寓意就係到時候放過自己喇!但蔣介石亦都係不為所動。至於最後一次求情,就係1960年宋美齡邀請張學良去士林禮拜堂做禮拜,宋美齡特意走到佢面前伸出手,令到眾人都認得張學良,但蔣介石仍然係不為所動。
就係咁樣三次求情再加埋宋美齡幫助下,蔣介石唔單止唔肯放過張學良,甚至臨終仲叮囑蔣經國,直指張學良係「籠中虎,不可放也」。之不過,真係人算不如天算,張學良囚禁足足54年之後,蔣介石、蔣經國都相繼去世,91歲嘅佢最終都係重獲自由,並且喺美國生活到101歲。
原圖嚟自網絡