早排其實就係中國第3艘航空母艦「福建艦」正式下水嘅日子，呢件事亦都標誌住中國人民海軍正式進入「三艦客時代」。喺呢個咁重要嘅時刻，我哋除咗要同國人分享之外，其實仲要同一啲曾經為中國海軍奮鬥過嘅前輩分享，而喺網上，即使遠在英國嘅北洋水師水兵墓地亦都有國人前往拜祭通知。咁問題嚟喇，點解遠到喺英國都會有北洋水師水兵墓地呢？阿史今次就同大家講一講啦！
其實英國北洋水師水兵墓地真係講開有段故！喺1881年、1887年，為咗可以通過軍備救國圖強，當時分別就有兩批洋水師官兵滿懷理想，去到英國紐卡斯爾造船廠接收炮艦、巡洋艦等新式海軍船艦。之不過喺過程中就有五名水兵袁培福、顧世忠、陳受富、陳成魁、連金源因長途勞頓、水土不服，而病故於異鄉。中國人講求入土為安，所以五名水兵就分別被下葬於聖約翰墓園嘅唔同位置，五座墓碑都係中式樣式，同當地人墓碑相背而立，佢哋都係一同面朝東方，遠眺故鄉。
而嚟到2017年，國家文物局委託中國文物保護基金會負責修繕工作，令到呢五位水兵墓地終於完成整修。由於呢件事跡傳開，間唔中都會有在英嘅國人去到墓前拜祭，並且擺放中國軍艦相片，告慰水兵英靈。
原圖嚟自網絡