繼續同史友們介紹世界各地嘅一啲最新考古發現，水下考古一向以嚟都係考古學界面對嘅一大難題，由於海底嘅情況多變，所以成功發掘到水底嘅文物往往都係一件困難嘅事。而近日喺希臘安提基特拉島海域附近，就有考古團隊喺一艘二千年歷史嘅古羅馬沉船當中有發現喎！阿史就帶大家睇一睇啦！
近排就有海洋考古學家喺呢個海域附近搵到唔少珍貴文物，其實呢艘二千年歷史嘅沉船並唔係近年先被發現，反而早喺1900年果陣就已經有一位希臘潛水員發現，但由於當時沉船附近全部都係腐爛屍體，初時呢位船長就以為呢位潛水員喺海底產生幻覺，直到自己潛落水底先至證實真相。結果喺一年時間內，佢嘅團隊就成功搵到36件同希臘神話中相關嘅神祇、青銅雕像、豎琴、用來預測天體位置嘅安提基特拉機械等。而相關嘅考古工作其實喺1953年亦都有展開，但期後嘅發掘工作就一被擱置近40年。
直到近年，伍茲霍爾海洋研究所（WHOI）先至取得希臘政府許可展開為期五年嘅計劃，喺呢艘可以追溯至公元前1世紀嘅沉船上搵到赫拉克勒斯（Hercules）大理石頭像、人類牙齒等等。呢啲發現都可以進一步了解到當時沉船嘅信息以及故事，係一次相當重要嘅發現！
原圖嚟自網絡