繼續同史友們介紹我國最新嘅考古發現，早期人類之所以可以生存落嚟，其中一個要素就係學識運用火進行保暖以及烹煮食物，呢一點早喺現代人演化出嚟之前，接近一百萬年前就已經做得到。之不過，如果講到將火應用到日常生活當中，就好似火坑咁樣，史友們又知唔知係幾時開始呢？
喺河北省文物考古研究院等團隊對邯鄲武安市趙窰遺址進行全面考察同埋研究之下，終於對於火坑嘅運用有咗新發現喇！考古人員對趙窰遺址進行發掘，竟然從中搵到一個火坑。在此之前，我國最早關於使用火坑嘅紀錄其實係喺2006年保定徐水東黑山遺址嘅西漢火坑，而今次發現嘅趙窰遺址火坑就係屬於商代。
據了解，呢個火坑係考古團隊喺一個半地穴雙室房址門道台階南側發現，據專家推斷，當時呢個房址前室硬土面正係火坑面，但就因為坍塌而凹凸不平，前室成個底部仲出面一條紅燒土淺溝從壁爐底部沿房址北壁向西，並且由唔同方向進入到硬土面下方並與其他灶坑相連，形成一個相當完善嘅供暖系統。原本以為今次發現只係單純一個火坑，但開開下竟然成個供暖系統都出埋嚟，真係估佢唔到！
原圖嚟自網絡