喺古代無數仕子都深信讀書可以改變命運，大部份人嘅一生都需要自小讀熟四書五經，博覽群書，繼而過五關、斬六將咁通過童生試、鄉試、會試、殿試等。正當大家都以為憑個人學識就可以高中狀元之時，原來因為一個名唔岩太后心意，就會招致落榜，阿史所講嘅呢位人物就係叫做譚延闓。
譚延闓出生喺清朝嘅名門世家，身為當時兩廣總督譚鐘麟之子，佢自幼就天資聰穎，師從王闓運、肅順嘅佢被稱為曠世奇才。譚延闓以十二歲之齡考獲秀才，後來因父親身體差而暫時放棄學業照顧父親。及後，經過十一年努力，佢終於考取到貢士第一名，可以參加殿試。譚延闓去到殿試表現依然都係出色，文采出眾、見解獨到亦令佢成為殿試第一名。
之不過，殿試第一名雖然係考試結果，但仍需要一個人答應先得，呢個人就係慈禧太后。由於當時慈禧太后對同樣係湖南人嘅譚嗣同恨之入骨，所以姓名相似嘅譚延闓令到慈禧相當厭惡，就係咁一下子由第一名跳到落二甲第三十五名。
逼於無奈回鄉從事教育事業嘅譚延闓當然唔服氣，佢父親喺接受唔到結果之下病重離世，雖然身受朝廷官職，但喺武昌起義爆發後，譚延闓就加入起義運動積極想推翻滿清，及後更被任命為湖南都督，真係命運弄人啊！
原圖嚟自網絡