今時今日如果現代人選擇退休，好多時候都會繼續留喺自己身在嘅城市，最多都係出外去下旅行咁，但如果同樣情況換轉喺古代，唔少官員都會選擇「告老還鄉」，到底點解佢哋要咁做呢？今次阿史就同大家講一講啦！
其實古代嘅退休制度早喺春秋時期就已經出展，並且喺唐、宋、元、明、清朝繼續得以完善、發展。咁古代嘅退休制度又係點呢？喺《禮記》當中就提到，官員「大夫七十而致事」，而喺古代人壽命唔算太長嘅時候嚟睇，基本上真係要做到死果日先可以退休。
「大夫七十而致事」呢個情況喺唐、宋、元等朝代都仍然盛行，直到明、清年間，退休嘅條件先至降至六十。咁如果官員想提前退休又有冇辦法呢？當然有啦！就係「告老還鄉」、「告病還鄉」喇！呢兩種情況就係指，官員雖然未達到退休年齡，但如果係老疾不能任事者，都可以主動請辭返到家鄉，而皇帝好多時候都會批准。
之不過，如果官員要選擇退休，多數都係順便「還鄉」，事關要提早離職嘅官員，好多時候都係想避開權力鬥爭、無心於官場，咁所以點解古代官員退休多數都會返到自己鄉下喇！
原圖嚟自網絡