繼續同史友們介紹一啲估佢唔到嘅歷史趣聞，以往就同史友們介紹咗唔同朝代嘅官員會拎到幾多薪俸，而今次就想同大家講一講到底清朝要養活一個八旗兵要用到幾多錢。
要知道喺入關前所謂嘅八旗子弟都係喺邊遠地區，而最初八旗出現亦都係因為邊遠地區生活艱苦，只有結伴而行先至可以狀大勢力，而八旗就係咁樣慢慢形成，並且喺後來清朝入關開國之時立下唔少汗馬功勞，一時之間八旗子弟就係為社會嘅貴族子弟。
雖然八旗確實係滿清皇朝建立嘅重要根基，為滿清提供咗重要嘅兵源，但隨住歷任皇帝對八旗子弟嘅優待，長期嘅享樂生活亦都令到八旗子弟慢慢變得唔識作戰。清政府為咗供養八旗，為佢哋提供咗「鐵杆莊稼」，每個成年嘅八旗子弟都可以每月領取到2兩白銀，即使係冇軍籍嘅都會有一兩白銀。而假如呢啲子弟結婚生仔，仲可以得到20兩白銀補貼（相當於當時正常家庭一年嘅收入），而呢啲優惠都只係講緊地位最低嘅八旗子弟，仲未計埋住屋等津貼。
隨住八旗子弟壯大，呢支作戰能力每況愈下嘅軍隊亦都成為清政府重大嘅負擔，亦係清政府對外戰爭連連失利嘅重要因素之一。
原圖嚟自網絡