最近阿史睇新聞，話內地網紅上網上示範點樣食鯊魚，點知就俾網友質疑係食咗條受保護嘅大白鯊，真係唔知呢位網紅點收科。
講到鯊魚，可能唔少史友都會諗起保育或者魚翅又或者係幾十年前個套電影《大白鯊》，咁古代中國人對鯊魚又有乜印象呢？响古時中國人對鯊魚印象其實好模糊，因為中原地區離海邊遠，後嚟海洋知識多咗，就對鯊魚認識多咗。好似明代李時珍响《本草綱目》就提及過：「時珍曰：鮫皮有鯊，其紋交錯鵲駁，故有諸名。古曰鮫，今曰鯊，其實一也。或曰：本名，訛為鮫。段成式曰：其力健強，稱為河伯健兒。」
不過古代中國人其實都知鯊魚係可食用，而且仲知點食。李時珍响《本草綱目》又有咁嘅記載：「背上有鬣，腹下有翅，味並肥美，南人珍之。」即係話以前南方人已經識食翅。而清代嘉慶年間成書、專記山東海產資料嘅《記海錯》就咁記載：「鯊魚色黃如沙，無鱗有甲，長或數尺，豐上殺下，肉瘠而味薄，殊不 美也，其腴乃在於鰭，背上腹下皆有之，名為魚翅，貨者珍之。」睇嚟古代嘅中國人已經知道魚翅係珍品。
原圖嚟自網絡