喺唔少影視作品當中，只要係涉及到盜墓嘅題材，無論係古今中外嘅作品都會將古墓內部描繪成機關重重，又有落石、又有飛箭等等，但憑住古代科技又係咪真係可以做到呢啲機關呢？今次阿史就同大家講一講啦！
如果要提到危險機械機關，其實就算幾精密都好，只要經過幾百年時間多數都會失效，所以如果係講到古墓當中嘅防盜，就必定要講講墓室喇！墓室嘅機關大致就有幾種，其一就係「頂門器」，通過銅製嘅軸一邊輕一邊重，喺墓主完成下葬後，關閉墓室大門就會將頂門器壓上，到時重嘅部分會往下沉而輕嘅部分會向上升，重重頂住墓室嘅門；其二就係「頂門球」，喺墓室後方就會有一條慢坡道及槽，喺完成安葬後，頂門球就會順著坡道往下滑卡實喺墓門，呢種設計就連清朝大太監李蓮英墓都有用過，但其實只要唔喺石門入墓室，基本上都無法防盜。
而為咗應對盜洞，古人甚至仲諗到以「積沙墓」嘅機關，即係將墓室分為好幾層，第一層就做封土，第二層就係極厚嘅積沙積石，第三層就係假墓，而喺假墓下方又再係積沙積石層，去到最底先係真正嘅墓，甚至有部分設計當中更加係流沙墓，唔少盜墓賊都會慘死其中，呢種「機關」同想像中嘅古墓機關真係有出入！
原圖嚟自網絡