無論係喺古今中外，帝皇、貴族嘅陵墓往往都最受盜墓賊歡迎，只要可以入到墓中，基本上就真係榮華富貴享之不盡！之不過，喺歷史上其實有一個帝后陵墓，即使動用咗40萬士兵挖掘咗足足三個月，都挖唔到陵墓出嚟！到底呢個陵墓係屬於咩人呢？阿史今次就同大家講一講啦！
呢個帝后陵墓其實就係唐高宗李治同埋皇后武則天嘅一個合葬墓，呢個坐落喺陝西省咸陽梁山嘅墓至今都仍然保存得相當完好，亦係唐陵中唯一一座冇被盜過嘅陵墓，到底點解會咁犀利呢？
其實歷史上並唔係冇人打呢個陵墓嘅主意，喺唐朝末年黃巢之亂果陣，其實黃巢動用40萬大軍想嘗試去挖出乾陵，但就算歷時幾個月挖到一條長達四十幾米嘅深溝都好，都仍然搵搵唔到墓道嘅入口，呢條深溝至今都仍然可以喺梁山西側見到。
後來喺五代、民國初年都仍然有人嘗試盜墓，民國國民黨將領孫連仲甚至動用炸藥都仍然搵唔到墓道口。直到1958年，幾個農民放炮炸石，無意中先炸出墓道口，經過陝西「乾陵發掘委員會」初步發掘，就認為係因為乾陵墓室由堅硬巨大石灰岩石條組建而成，岩石之間亦都有鐵栓、錫填滿，加上喺半山之上，所以真係有幾重保護！
原圖嚟自網絡