尋日介紹咗西晉開國功臣賈充為司馬家打江山建功立業，但就留下禍根令西晉皇朝萬劫不復，就係因為佢個女賈南風。
賈南風係賈充千金，十五歲時冊拜為太子司馬衷之妃，司馬衷亦係後嚟嘅晉惠帝。其實當初司馬炎係想立衛瓘女為太子妃，但佢個皇后就想立賈女，《晉書‧后妃傳》記載咗司馬炎嘅評語都相當有趣：「衛公女有五可，賈公女有五不可。衛家種賢而多子，美而長白；賈家種妒而少子，醜而短黑。」呢句評價亦係後世對賈南風醜樣印象嘅一個明證。不過呢個賈南風為人相當厲害，智力有問題嘅晉惠帝非常怕佢，而賈后為人亦相當殘忍，包括嘗以戟擲太子之孕妾，嬰兒隨刃墮地，又下密詔命楚王司馬瑋入京誅殺惠帝外公太傅楊駿，後嚟仲殺埋司馬瑋。佢殺楊太后，謀廢太子，引起宗室諸王不滿，最終引發八王之亂，動搖咗西晉根基。而佢最後亦被趙王倫以為太子報仇之名而殺死。
賈南風唔單止又醜又殘忍，响《晉書》仲有記載佢荒淫一面：「后遂荒淫放恣，與太醫令程據等亂彰內外。」此外，仲話洛南有個尉部小吏忽然有非常衣服，被人拉咗個陣就話有個年可三十五六，短形青黑色嘅婦人，同佢「共寢歡宴，臨出贈此眾物」，聽到以上說話嘅人就知呢位婦人係賈南風。
原圖嚟自網絡