近排天氣炎熱，世界各地都出現酷熱嘅極端天氣，作為一個現代人，比較欣慰嘅就係有冷氣呢樣發明可以畀大家度過炎熱嘅夏天。但如果喺古代，冇冷氣嘅情況之下，明清兩代皇室居住嘅故宮又有冇咩設計發明可以消暑呢?
當時興建故宮嘅工匠就用到幾種唔同方法去令故宮達至消暑嘅效果！其一，亦都係最簡單嘅一樣，就係將皇宮內嘅牆壁整到相當厚實，呢個設計就係可以減少建築內外嘅傳熱，所以喺太和殿嘅牆壁，厚度其實係達到1.45公尺之厚，真係誇張！
唔單止咁，當時工匠仲諗到一種相當有趣嘅方法。古代建築當中，造牆方面仲有一種「填餡」嘅造牆法，工匠會喺牆壁兩層磚塊當中填充一層碎磚碎石。呢種方法可以令到牆壁之間嘅傳熱發生改變，令到建築物可以保持原來嘅溫度而唔受外部影響，真係犀利！
原圖嚟自網絡