又嚟到暑假呢啲時候,以往呢啲日子相信唔少史友都已經去咗旅行,之不過由於疫情關係,大家可能幾年都已經冇再出去,咁唯有就等阿史帶大家睇睇我國嘅一啲有特色嘅歷史古蹟,過下旅遊癮啦!
寺廟基本上係阿史去到內地經常都會遊覽嘅地方,印像最深刻嘅除咗有河南白馬寺之外,就係位於福建嘅甘露寺喇!呢所甘露寺始建於西元1146年,同大家見開嘅寺廟唔同,呢座建築其實已經深嵌入到岩石洞穴中。由遠處睇去,唔難發現建築有住四幢造型精美嘅樓閣,而近睇就更加驚險,全因為呢四幢樓閣全由一條原木柱支撐,並且已經歷經千年,真係藝高人膽大!
而之所以古人要以「一柱插地,不假片瓦」嘅方式建造建築,純粹為咗克服呢種惡劣嘅地形。之不過,關於呢座廟嘅起源,其實都有個故事可以講:喺北宋時期,就曾經有位母親前來岩石嘅位置求子,表明如果可以生到仔,到時岩有幾大,寺廟佢就會起到幾大,而結果佢亦都真係生到個仔,後來仲高中埋狀元。為咗回應母親嘅承諾,呢位葉狀元後來就搵嚟天下建築高手,直到一位叫做周斫頭嘅建築師出現,先至以一條原木解決廟宇無法建成嘅問題,真係估佢唔到!
原圖嚟自網絡