由於厚葬嘅習俗興起,喺唔同朝代每當有帝王、貴族逝世,佢哋嘅陵墓自然就成為唔少盜墓賊虎視眈眈嘅目標。與此同時,民間亦都會開始流傳各種諺語,例如就有一句「打開康王墳,山東不受貧」。咁到底康王墳係咪真係咁犀利,只要一打開就可以令到成個山東人民唔再貧困呢?
關於康王嘅記載,其實正史當中並唔多,喺歷史上佢其實就係漢景帝劉啟之子劉寄,早喺孝景帝中元二年佢就被封為膠東王。但由於佢本人就唔太安份,喺淮南王劉安謀反時,佢係有份勾結仲想參與謀反,但謀反好快就被鎮壓,劉寄亦都因為太過恐懼就喺漢武帝元狩二年發病去世,諡為膠東康王。
劉寄雖然只係地方上嘅一個小王爺,但由於佢喺自己領地上大肆地欺壓百姓,掠奪財富,所以當時就已經有傳佢係相當富有,連陵墓都已經為自己修建好。咁到底「打開康王墳,山東不受貧」呢句說話成唔成立呢?據考古學家推斷,按當時康王嘅財力以及山東嘅人口,呢件事係存在可能性。
亦都因為呢句傳言,喺2000年嘅時候就曾經有盜墓賊鎖定咗六曲山呢個地方,佢哋深信呢度連同康王墓有超過三百六十座古墓,但喺動手之前就已經被當地警方拘捕。所以,傳言係真定假,至今仲未證實到!
原圖嚟自網絡