近排阿史都同大家講唔少關於盜墓嘅奇聞,之不過唔知史友們又有冇發現,阿史喺介紹一啲先人墓葬嘅時候,繼續都會用到唔同嘅詞去形容,例如就有墳、墓、塚、陵呢四個類別。明明都係用嚟埋葬先人,咁到底呢四類墓葬又有咩分別呢?阿史今次就同大家講一講啦!
要知道古人都係「事死如事生」,對於死後嘅世界係相當重視,所以唔少古人喺生前都會為自己選擇好墓地,仲會對埋五行八卦,風水龍脈,真係相當講究。到底墓葬嚟講又有咩種類,佢哋之間又有咩分別呢?
先講講大家最常見嘅「墓」,其實「墓」多數都係同「墳」一齊並稱,要區分亦都唔難,就係「築土為墳,穴地為墓」。而「墳」墓葬亦都係相當簡單,基本上就係「草席一卷,入土為安」。「墓」就係屬於好少少嘅情況,通常都會配備棺材,並且修築墓碑,都算係相當易認。
關於「塚」,相信大家即時都會諗起「衣冠塚」呢個詞,基本上嚟講「塚」就係一種又高又大嘅墳,由於規模好大,平民百姓係冇資源興建,所以只有有身份嘅人先至會整。而假如係「衣冠塚」呢個類別,「塚」當中就只會有死去之人嘅衣物以及大量陪葬品,屍身就多數都係搵唔返,所以「衣冠塚」一直都係唔少盜墓賊嘅目標。
至於「陵」,相信唔少史友都知道,一定係皇帝先至會用到。事關「陵」呢個詞本身就係解做「翻越大山」嘅意思,當中仲會牽涉到一個國家嘅運勢,規模仲會比宮殿更為大型,咁所以大家經常都會提到「皇陵」、「陵寢」等等嘅詞語。
原圖嚟自網絡