繼續同史友們介紹位於我國各地嘅一啲名勝古蹟，上次就同史友們講到福建甘露寺點樣憑一條原木柱支撐千年，而類似嘅寺廟其實我國亦都有唔少，今次就同史友們講一講山西嘅縣空寺有啲咩「黑科技」啦！
山西懸空寺位於大同市渾源縣，係一座集有儒釋道三教合一嘅寺廟。關於懸空寺嘅起源，普遍講法係話呢座寺廟始建於北魏年間，而現時嘅主要建築都係喺明清年間進行重建。但唔知史友們又知唔知，其實懸空寺最初之所以會出名，並唔係因為建築有幾咁壯麗，而係因為一個字，險！
呢座屹立千年嘅建築位處山勢陡峻半山腰，普遍嚟講大家都會認為佢係依靠27根山西當地特產鐵杉木加工嘅橫樑支撐，但真相又點止咁簡單？當研究團隊進行維修時，就喺懸空寺嘅結構當中搵到一樣古代「黑科技」，就係喺所有橫樑嵌入之處，都佈滿咗人工倒齒，木頭縫隙之間就被裝填上木楔，換言之呢種其實就係古代嘅「爆炸螺絲」，憑住呢種手法令到橫樑鑲嵌喺橫檔上，真係不得了！
原圖嚟自網絡