上次阿史介紹古代一種叫冰刑嘅酷刑，有史友就問古代係點樣製冰嘅呢？呢排天氣咁熱，講下呢個話題都幾合時宜。响古代，冰係被視為珍貴之品，能夠响夏天享用冰嘅人，生活條件都有返咁上下。至於古代人點樣製冰，其實佢哋嘅方法就係儲存。响古代要儲冰，就係响冬天時响結咗冰嘅河鑿冰出嚟，再搵個地方儲起佢，等到夏天嘅時候就可以拎啲冰出嚟享用。
如果史友們去過北京故宮，都可能會見過宮中有個叫冰窖嘅地方，個度就係皇家御用嘅藏冰之所。唔好以為儲冰同拎啲冰嚟用係一件普通嘅事，响古代無論係鑿冰、藏冰、開窖拎冰嚟用都係好重要嘅事，《周禮．天官》就記載「凌人掌冰之制」：「凌人：掌冰政。歲十有二月，令斬冰，三其凌。祭祀，共冰監。賓客，共冰。大喪，共夷盤冰。夏，頒冰掌事。秋，刷」。
樣樣嘢都有規有矩，隆重其事，真係唔講得笑。
原圖嚟自網絡