喺中國古代嘅文化當中,幾乎每個朝代嘅帝王都同「龍」密不可分嘅關係,自稱為「真龍天子」嘅帝王,唔單止喺建築方面,甚至喺服飾都加入唔少龍嘅元素,就好似「龍袍」咁樣,幾乎歷朝歷代嘅君主都會穿著。但史友們又有冇諗到,原來宋朝嘅帝王係「另類」,事關佢哋就算係上朝穿著嘅服飾唔單止冇「龍」,甚至睇起嚟同普通官員都冇乜分別!
由於喺古代社會當中有係好嚴格嘅等級制度以及對禮儀嘅規範,所以歷朝歷代嘅帝王喺出席唔同場合都會有各種服飾,就好似有冕服、朝服、常服、行服等,當中單單係祭祀典禮喺周代嚟講就已經有六種唔同嘅冕服,真係誇張!而喺帝王咁多服飾當中,就以龍袍最為莊嚴同埋具有特色,雖然每個朝代對於龍袍嘅設計都會有啲唔同,數量可能都會唔一樣,但有「龍」喺上面係必然嘅一件事!
咁問題嚟喇,點解去到宋朝,皇帝嘅服飾就會變到咁唔一樣,甚至衣服上唔見有「龍」呢?喺當時宋朝嘅審美嚟講,比較偏向純色系嘅衣服,亦都主張穿衣係要以低調、舒適為主,所以充滿刺繡、頭冠嘅龍袍就唔符合呢個原則。而且,喺當時重文輕武嘅年代,皇帝都鍾意舞文弄墨,成日著住浮誇造作嘅龍袍反而不利佢哋同文人打交道。
雖然講就咁講,但其實宋朝「龍袍」通天冠服當中,都係有以隱晦嘅方式將龍嘅樣式繡出嚟,但皇帝就真係唔多會穿著喇!
原圖嚟自網絡