响三國時代，以司馬懿為首嘅司馬氏一族响高平陵之變後，漸漸取代曹氏勢力。不過熟悉三國故事嘅史友都知，曹操起家就同夏侯一族嘅將領大有關係，咁响司馬氏取代曹魏後，夏侯一族又有乜境況呢？
响曹操時代，嚟自沛國譙縣嘅夏侯一族就跟住曹操打江山，最為人熟悉就係大將軍夏侯惇、征西將軍夏侯淵，而佢哋嘅仔都係魏蜀吳三國時代活躍嘅將領，响魏國當中夏侯一族地位都相當崇高。不過，咁顯赫嘅家族就好難避免捲入曹氏同司馬氏嘅紛爭當中。好似司馬懿發動高平陵之變，族滅曹爽，夏侯淵次子夏侯霸為避禍遂逃入蜀漢。夏侯尚之子、大將軍夏侯玄因誅殺司馬師計劃失敗而遭夷滅三族。
不過，夏侯一族其實都係大族，除咗同曹氏有姻親關係，唔少都同司馬氏有姻親關係，所以响司馬氏取代曹魏之後，都有夏侯族人為司馬氏效力。好似夏侯淵個孫夏侯莊，出任淮南太守，其妻仲係司馬師老婆嘅堂妹；夏侯淵另一個孫夏侯駿就任安西將軍；夏侯淵曾孫夏侯湛，就响晉惠帝任散騎常侍。
原圖嚟自《三國演義》劇照