繼續同史友們介紹我國最新嘅考古發現，近日喺湖南醴陵就有考古團隊發現到一個窯址。本來搵到一個窯址已經相當難得，但更難得嘅係原來呢個窯址唔單止係東漢中晚期嘅窯址，更加係湘東地區第一次發現嘅青瓷窯址。到底呢個考古發現有咩特別？今次阿史就同大家講一講啦！
早喺今年4月，考古團隊就喺淥水流域進行調查嘅時候，就意外發現到一個受到破壞嘅窯址。為咗進一步可以了解窯址情況，喺國家文物局批准下，株洲市文物局就組織市縣兩級博物館以及醴陵窯管理所考古人員對殘存窯址進行搶救性考古發掘。
經過長時間嘅考古調查，團隊就發現呢個窯址係依山勢而興建嘅長條形龍窯，由於窯頭已被破壞，所以就只係可以量度到窯殘長7.2米、寬2米。至於窯床以及窯尾就得以保存，但窯頂亦都已經坍塌。除咗窯嘅建築結構之外，考古團隊就喺遺址當中搵到唔少方格紋硬陶片、方格紋青瓷片以及罐、壺、釜、盤等等器物，經過比對之下考古團隊就認為同湘東地區東漢中晚期磚室墓葬嘅陶瓷器相同。
呢次考古發現唔單止更新咗考古學界對醴陵製瓷歷史嘅認知，亦都係湘東地區首次發現東漢時期印紋硬陶以及青瓷窯址，真係難得！
原圖嚟自網絡