每當提起三國故事中嘅劉備，唔少人都記得佢有五虎將在陣。雖然佢哋能力被《三國演義》捧到好高，但無可否認佢哋係劉備軍中嘅重要將領。不過近十幾年就有講法指劉備軍中有位神秘將領，而且佢嘅戰力可以媲美趙雲。
呢位武將叫陳到，不過有關佢嘅記載就真係比較少，好多時都係响其他人嘅記載中先會出現。好似《三國志·劉彭廖李劉魏楊傳》中有載：「以諸葛亮欲出軍漢中，嚴當知後事，移屯江州，留護軍陳到駐永安，皆統屬嚴。」呢段話就見到留護軍陳到駐守永安，統屬於李嚴之下。而响諸葛亮俾諸葛瑾嘅信中就提及：「到所督，則先帝帳下白毦，西方上兵也。」又一次提到陳到協助李嚴鎮守白帝城，以及係效力於劉備帳下嘅精銳白毦軍。
至於呢位陳到，响劉備軍中地位都唔算太低，好似《華陽國志》記載過：「嚴還江州，征西將軍汝南陳到為都督。」响呢段話中，就知道陳到係汝南人，以及位至征西將軍。而當時趙雲為征南將軍，可想而知佢地位都唔係好低。
咁點解佢响三國將領中唔係太出名呢？其中一個原因就係《三國演義》無提過佢，生平往事自然無得被「加工」。另有講法話响蜀國裡面，以李嚴為首嘅一派被諸葛亮一派排斥，可能因為咁陳到嘅事跡就少被人提起。不過奇怪嘅係，有人就話趙雲响《三國演義》中嘅經歷，有啲其實係嚟自陳到，唔知史友們又點睇呢？
原圖：《新三國》