繼續同史友們講下一啲古代行軍打仗時嘅冷知識，要知道古代嘅科技同埋衛生情況都不如現代，但喺古代嘅戰爭郁啲就會動用到成千上萬嘅軍隊，咁到底呢啲士兵如果需要大小二便嘅時候，又會點樣解決呢？
相信史友們即時都會答喺荒山野嶺解決，咁當然呢個答案會係事實但又未至於咁簡單！原因係數以萬計、甚至上十萬嘅人數如果喺曬荒山野嶺解決大小二便，一嚟絕對係會破壞環境、引起瘟疫，二嚟就係相當容易畀敵軍發現，所以如果要大小二便係需要聽從將領安排，選址亦都係相當講究！
簡單嚟講有幾個原則需要遵守，其一就係要遠離百姓生活區域、遠離水源並且需要分批如廁。唔單止咁，喺如廁前，士兵就要先喺坑底鋪上生石灰，如廁完畢後，會用泥土將其掩埋一層，直到成個區域填滿先會轉場。唔單止咁，士兵其實仲需要收集起糞便，亦即係之前阿史所介紹嘅金汁。呢啲糞便喺古時就會用嚟加工成「金汁」抹到弓箭之上，又會加熱淋到敵軍身上，單單係呢啲細菌就足以置人於死地。簡簡單單去個廁所原來都有咁多計謀，真係估佢唔到！
原圖嚟自網絡