剛才就同史友們講到國姓爺鄭成功因為唔想台灣呢片土地落入外國人嘅手中，所以不惜帶住兩萬士兵越洋都要收復台灣。然而，台灣呢片土地唔單止受過荷蘭侵略，其實喺近代亦都受過日本侵略，而呢一切就要喺「春帆樓」開始講起。
心水清嘅史友應該都知道，阿史所講嘅呢座「春帆樓」，其實就係1895年中日《馬關條約》嘅談判以及簽署地點。春帆樓前身其實先係阿彌陀寺、月波樓醫院，但去到1884年醫師藤野玄洋過世後，呢度就成為割烹旅館，並由伊藤博文取名為「春帆樓」。
本來簡單一間旅館係唔會令到台灣悲痛50年，但喺1894年日本與清朝發生甲午戰爭後，擔任日方全權代表嘅伊藤博文就考慮到呢個地方可以見到關門海峽，喺談判期間可以將軍艦駛至遼東半島以威嚇清國代表，所以就揀咗呢個地方作為談判以及簽署《馬關條約》嘅地點。
就係咁樣，喺呢座睇落平凡嘅建築當中，一條令到台灣進入接近50年嘅日據時期嘅條約就咁樣簽署。
原圖嚟自網絡