過往幾日阿史都同史友們介紹咗好多日佔時期日軍對台灣人民以及原住民所做過嘅暴行,特別係經過所謂嘅「五年理蕃計劃」之後,原住民嘅命運大受改變,唔少部落都被殘忍消滅。為咗應對呢一切邪惡嘅侵略,喺1930年就有一場原住民武裝反日事件發生!
如果史友們有印象,應該都會記得好多年前台灣就出過一部電影,就係以「賽德克族」為故事背景,講述返當時嘅賽德克族係點樣發起「霧社事件」。成件事嘅起因全因為賽德克族原住民不滿日本統治當局長期苛虐暴政,於是台灣原住民賽德克族馬赫坡社頭目莫那·魯道率領德克達雅群各部落聯合起事,決定攻擊由日軍所建立嘅樣板聚落霧社。
喺「五年理蕃計劃」之後,霧社地區駐蕃地警察人數減少,但同時對霧社城鎮與林業資源進行多次開發,拖欠薪金以及林地減少令到原住民生計大受影響。於是,喺10月27日,賽德克族計六社1,236人就喺當日趁霧社公學校舉行聯合運動會發動襲擊。
隨住日軍以飛機、山炮、毒氣等武器強力鎮壓,起事領袖莫那·魯道飲彈自盡,數百位族人寧死不屈下集體自縊。由1896年至1930年「霧社事件」原住民死士先後發動150餘次武裝反日行動,台灣人最後一次武裝反日行動就咁結束。
原圖嚟自網絡