繼續同史友們介紹我國最新嘅一啲考古發現，對於鎖陽城塔爾寺呢座世界文化遺產，相信唔少史友們都知道佢係位於甘肅酒泉市瓜州縣荒漠戈壁當中，但到底呢座建築又係幾時開始興建呢？近排考古團隊就有最新嘅發現，可以同史友們講一講！
鎖陽城喺歷史上係扼守絲路交通嘅要塞，目前成個鎖陽城遺址就係位於河西走廊西端、疏勒河昌馬沖積扇西緣，總面積足足達到15788.60公頃。由於以往呢個地方真係古代絲綢之路上一個重要城鎮，所以相關嘅遺址唔單止得一個城址，而係有埋農業灌溉渠系遺跡、鎖陽城墓群以及塔爾寺遺址。
喺考古團隊最新嘅考古發掘研究當中，就對鎖陽城遺址區、塔爾寺遺址區、古代渠道遺址區、鎖陽城墓群區四部分進行歷時四年嘅發掘工作研究，基本上已經成功掌握塔爾寺遺址分布範圍、建築形制、修建時間等。
據目前了解，塔爾寺遺址位於鎖陽城城址東部約1.5公里處，整體面積達到約2.2萬平方公尺，內院現存大塔1座，小塔9座。而呢座外形獨特、歷史意義重大嘅塔爾寺到底係幾時建成呢？據考古團隊發掘出嘅琉璃建築構件等出土文物證明，塔爾寺建於隋唐、興盛於西夏時期，並且仲係古代絲綢之路上一座高等級寺院，真係犀利！
原圖嚟自網絡