提起「盧溝橋」呢個地方，可能唔少史友都會諗起令無數國人傷痛嘅「盧溝橋事變」，之不過「盧溝橋」本身其實都係一座名勝古跡，當中有唔少故事都值得同大家分享，其中一項就係數唔清嘅盧溝橋石獅子喇！
可能唔少史友都會諗，其實啲石獅子一直都喺同一個位置冇移動過，又點會數唔清呢？咁就要由盧溝橋嘅歷史開始講起啦！呢座古橋建於1192年，至今已經有八百幾年歷史。如果史友們有去過呢個地方，應該都會發現橋上東側橋頭左右兩側都各有一隻伏地石獅，而西側橋頭則各有一隻伏地石象。講到最巴閉，其實就係橋東北立有乾隆御書「盧溝曉月」碑，而呢個景象亦即係「燕京八景」之一！
嚟到呢座名勝古跡，唔少遊客除咗會喺橋面影相打卡之外，其實仲有件事經常都會做，就係「數獅子」。數得獅子多其實就當然會想要一個正確答案啦！唔講唔知，其實呢座橋上嘅獅子好幾次都數唔清！
早喺明代《帝京景物略》中，就係以「數之輒不盡」形容盧溝橋石獅子數目，而喺1960年代，其實就有學者數出485隻石獅；但又喺1979年，石獅數目又變成502隻，而喺之後再數，數目都係會產生變化，到底當中有咩原因呢？
其實不外乎就有幾個原因，其一就係因為盧溝橋以往真係一條交通要道，不時都會發生車禍意外，所以呢啲獅子受損後重製需時，數目就會唔一樣。而且，石獅喺幾百年間受到酸雨腐蝕都會面目模糊，到底計唔計算在內都會有唔同標準，咁所以石獅子數目就一直都數唔清喇！
原圖嚟自網絡