早排阿史就同史友們講到點解清朝妃子都要戴上指甲套,唔少史友就想阿史再講多啲類似嘅趣聞,咁今次就同大家介紹下清朝妃子頸上嘅「白布條」啦!
相信喺唔少影視作品又或者歷史畫作當中,大家都唔難發現其實清朝妃子嘅衣服雖然都各有不同,但每件衣服之上都會有一條白色嘅布條纏繞頸部一圈,到底當中有咩原因呢?
其實呢啲白色布條都係有個好聽嘅名,就係叫做「龍華」。要知道清朝嘅滿人喺未入關之前都仲係遊牧民族,對中原文化並唔熟悉。而為咗可以好好管理國家,入關後就開始學習儒家文化,所以喺順治年間就出現呢種「龍華」,為咗可以令到女子頸部肌膚唔會外露。
除咗以上呢個原因之外,其實「龍華」仲有另外一個大作用,就係象徵配戴者嘅身份。喺「龍華」之上,其實係會根據唔同人唔同身份,繡上好多獨一無二嘅圖案,例如皇后就會繡上國花牡丹,其他等級比較低嘅妃子就會有花中四君子作為選擇,而妃位以下嘅就只能夠繡上簡單嘅草點綴一下。所以,「龍華」除咗係為咗符合禮節之外,仲係有咁樣嘅功用!
原圖嚟自網絡