繼續同史友們介紹一啲有意思嘅歷史命題,要知道喺明朝嘅帝皇當中嚟講,雖然祟禎生性多疑,但執政之時都係勤勉節儉,處處為國家著想,未必係一個最差嘅君主。亦都係因為呢個原因,後世唔少學者都嘗試去追溯明朝滅亡嘅原因,於是就曾經有一句「明亡於天啟,實亡於萬曆,始亡於嘉靖」嘅說話流傳,今次阿史就同史友們講講「明始亡於嘉靖」呢句說話啦!
要講到一個皇朝係始亡於一個皇帝嘅執政其實係一個好嚴重嘅講法,但到底呢個講法又有啲咩根據呢?明世宗嘉靖帝係明朝第十二任皇帝,喺佢執政前期其實都係銳意圖治,曾經斬殺前朝錢寧、江彬、王綸等奸臣,裁革錦衣衛及監局寺廠司庫、旗校、軍士、匠役十七萬餘人,實現「嘉靖中興」。
咁好地地將一個國家管理得唔錯嘅帝皇,又點解會被認為係亡國嘅君主呢?原來嘉靖帝雖然繼續明武宗嘅帝位,但其實佢生父係興獻王朱祐杬,佢曾經就因為想為生父興獻王朱祐杬追尊上號而同楊廷和、毛澄為首嘅正德舊臣發生嚴重衝突,亦係史稱「大禮議事件」。呢件事之後,唔少大臣都遭到嘉靖帝大清洗,而佢自己喺在位後期亦都深居西苑不上朝,朝上大小事都交由專權、貪贓枉法、殘殺忠良嘅嚴氏父子處理,結果就令到民眾起義無數。
以上所講嘅算得上係人禍,而喺嘉靖帝在位期間,其實陝西省發生人類歷史上死亡人數最多嘅地震,呢場「嘉靖大地震」令到明朝國庫連續兩年虧空,真係誇張。咁所以,喺天災人禍一齊嚟嘅情況下,「明始亡於嘉靖」都有啲道理,唔知史友們又點睇呢?
原圖嚟自網絡