之前介紹咗好多日本強佔台灣後殘殺台灣同胞同埋台灣同胞抗日起義嘅歷史,今次就要講講响十九世紀末一位愛國詩人點樣投身抗日事業,佢個名叫做丘逢甲。
丘逢甲係台灣苗栗人,祖先原本係廣東客家人,乾隆年間佢曾祖父丘仕俊遷到台島定居。丘逢甲自幼讀書不輟,14歲考到秀才,25歲赴福州鄉試中舉,之後再中埋進士。不過佢就無去做官,而係返台島辦學。不過,响1895年一條不平等條約《馬關條約》就改變咗佢嘅一生。日本通過《馬關條約》強佔台灣,丘逢甲於是以「抗倭守土」為名,變賣家產創辦咗一支義軍,更擔任全台義軍統領。可惜,經過一個月戰事義軍傷亡慘重。
最終,丘逢甲離開台灣返回大陸,响佢離台前仲留下著名嘅《離台詩》:「宰相有權能割地,孤臣無力可回天;扁舟去作鴟夷子,回首河山意黯然。」
講多句,台中市嘅逢甲大學,就係以丘逢甲命名。
原圖嚟自網絡