尋日就同史友們介紹到愛國詩人丘逢甲喺見到日本侵佔台灣、殺害台灣同胞後,就不惜變賣家產籌組義軍抗日,但最終都係不敵而需要返回大陸。咁既然叫得做愛國詩人,丘逢甲自然就有唔少詩作值得大家學習,好好了解先輩嘅愛國情懷,今次阿史就同大家講一講《春愁》。
丘逢甲喺年僅14歲之時就被巡撫丁日昌譽為「東寧才子」,畢生就寫過《蟄庵詩存》、《柏莊詩草》、《羅浮遊草》、《離台詩》等著作,被錢仲聯譽為「七律一種,開滿勁弓,吹裂鐵笛」、梁啟超譽為「詩界革命鉅子」、「天下健者」等等。而丘逢甲著名作品除咗有離台前寫落嘅「宰相有權能割地,孤臣無力可回天」外,其實仲有一首《春愁》值得同大家介紹。
喺1894年甲午戰爭爆發、1895年以清政府落敗,簽訂喪權辱國嘅《馬關條約》告終,喺當時嘅時代背景下,丘逢甲寫下傳世《春愁》:「春愁難遣強看山,往事驚心淚若潸。四百萬人同一哭,去年今日割台灣」,詩中深深表達咗當時台灣同胞嘅悲憤心情,絕對係傳世佳作!
原圖嚟自網絡