以往阿史都同史友們介紹過每逢夏天，清朝嘅皇室貴族都好鍾意去一個地方，呢個地方就係現存我國最大嘅皇家園林，承德避暑山莊。講到呢個山莊，其實佢嘅正門牌匾係由文武雙全嘅康熙皇帝題字嘅。之不過，唔知史友們有冇留意到牌匾上竟然有個「錯」字呢？今次阿史就同史友們講一講啦！
要知道康熙皇帝自幼就天資聰穎，博覽漢學經典，寫錯牌匾上嘅「避」字可能性係極低，再仲會有群臣提醒，寫錯字其實係唔可能發生。換言之，正門牌匾上嘅「避」字之所以會多一橫，就係刻意為之，咁到底當中有咩原因呢？
其實，喺牌匾上題字而寫成錯別字嘅事件經常都會發生，除咗係因為書法喺演變過程中有唔同寫法之外，仲係因為有時會有特別嘅用意。就好似清代兩江總督劉坤曾經提過「風流宛在」匾額，最終寫出嚟就係「流」字少咗一點而「在」字多咗一點，寓意少點風流、多點實在。
咁康熙皇帝呢次又有咩寓意呢？後世學者就認為，康熙皇帝係刻意將「避」字寫錯去避免呢個唔好嘅詞匯、破除厄運，唔知史友們又點睇呢？
原圖嚟自網絡