今時今日如果大家想表達「購物」呢個意思，基本上都會用到「買東西」呢個詞。之不過，唔知史友們又有冇留意到，明明「東西」只係兩個方向，但點解又可以表達到「購物」呢個意思，咁「買南北」到底又得唔得呢？
關於「買東西」呢個詞嘅起源，其實主流嚟講就有幾個講法：
其一就係同王安石有關！話說有次北宋皇帝宋神宗就問王安石以上嘅呢個問題，就係「市中貿易，何以不曰南北，而曰東西？」而王安石當時就解答「當取東作西成之意」。就咁睇呢句史友們可能唔明，但其實「東作西成」係解做春種秋熟咁解，而糧食喺古代又真係最重要嘅必需品，所以當時就以「東西」呢個詞泛指所有日常生活用品喇！
其二就係同宋代理學家朱熹有關！有次佢就問到好友盛溫如手提木籃去邊，結果佢就回應去「買東西」。呢個答案就令到朱熹相當不解，而盛溫如就回應「東方屬木，西方屬金，凡屬金木類，籃子裝得了；而南方屬火，北方屬水，水火之類的籃子是裝不得的，所以只能買『東西』，而不能買『南北』」。
咁所以，就咁睇嚟「東西」呢個詞其實蘊含咗好深厚嘅中國傳統文化以及古人嘅智慧。
原圖嚟自網絡