上次講過「賣豬仔」呢個詞係啲人坐船去外地時所發出嘅聲音有關，單係睇字都覺得好唔人道。話時話，相信史友們都知珠三角地區有啲地方係被稱為僑鄉，因為當地唔少人當年被「賣豬仔」出外打工，後嚟賺到個錢又返鄉生活。話時話，點解廣東會咁多人被「賣豬仔」呢？
其實呢個本來係同廣東福建地理位置有一定關係。呢兩個省份位於東南沿海，自古以來同外地經貿關係相當密切。早响唐宋時期已經有中國人遠赴東南亞落地生根，好似周達觀响真臘見到有啲响當地生活嘅中國人，被稱為唐人。而响清代廣東福建一段對外海路交通已甚為發達，而响十八十九世紀東南亞、美洲一帶需要龐大勞動力進行開發，作為當時人口大國嘅中國自然係勞動力嘅來源。仲有一點就係，清中葉開始中國經濟情況轉差，所以就有唔少廣東壯丁為咗謀生願意成為契約華工去外地打工，上次講過有啲「豬仔」其實係自願被賣去外地，就係呢種。而且「賣豬仔」呢門生意，有供有求，人口販子自然諗盡辦法搵「豬仔」，所以以往澳門就有好多「豬仔館」，單單咁睇好自然就明白點解咁多廣東人做咗「豬仔」。
原圖嚟自網絡