繼續同史友們介紹世界各地嘅最新考古發現,古代嘅「豪宅」可能大家都見過唔少,喺古代城市當中搵到「豪宅」並唔出奇,但喺沙漠當中嘅「豪宅」又會係點呢?阿史今次就帶大家睇一睇啦!
據以色列文物局最新嘅消息,近日考古團隊就喺以色列南部嘅蓋夫沙漠地區發掘到一個距今1200年前建造嘅「豪宅」遺址。咁到底沙漠當中建成嘅豪宅有咩特別呢?
先由整體建築佈局開始講起,沙漠當中嘅豪宅喺建築群主體附近都有邊翼圍繞住中央庭院,而內部建築就好大量房間,當中仲可以發現到大廳係鋪有大理石地板以及牆上曾經繪有壁畫。喺其中一處房間,考古人員仲發現有裝飾玻璃碎片、餐器皿以及大烤爐等等。
而當時嘅人其實都有為居住喺沙漠當中作出特殊嘅設計,例如喺中央庭院地下5.5米深處就有多個複雜石制地窖,分別連接住3米深嘅岩石結構蓄水池以及其他尚待發掘嘅地下建築群,真係犀利!
原圖嚟自網絡