「一騎紅塵妃子笑,無人知是荔枝來」。講到荔枝,相信史友們都知珠三角一帶好多地方都出產荔枝,記得以前啲街坊福利會仲會搞啲荔枝團等啲街坊上去摘荔枝。最近阿史就食到一款荔枝,原來都相當特別。
呢款荔枝叫桂味荔枝,產自廣州南沙。呢款荔枝爽脆清甜有肉之餘,仲伴有淡淡桂花香。荔枝有桂花香點解會咁神奇呢?南沙一帶種荔枝原來已經有400幾年歴史,而响1985年,當地就引進咗桂味荔枝仲大規模種植,而桂味荔枝亦係廣東省荔枝當中其中一款貴價貨。有趣嘅係,荔枝响當地仲有一個生財方法,就係將荔枝樹樹枝變成荔枝柴。用嚟做乜?拎去燒燒鵝用。
原圖嚟自網絡