在位逾 70 年嘅英女王伊莉莎伯二世離世,終年96歲。提到佢同香港之間嘅關係,相信唔少史友都會諗起佢係首位前往香港嘅英國在位君王,咁到底當年英女王嚟到香港之後去咗咩地方呢?阿史今次就同大家講一講啦!
出生喺1926年嘅伊莉莎伯二世本來並唔係王位繼承人,但就因為佢嘅叔父國王愛德華八世為迎娶美國社交名媛沃利斯.辛普森毅然放棄王位,最終由喬治六世繼位國王,而伊莉莎伯二世後來更加以第一位繼承人嘅身份繼承王位。
喺佢上任以嚟,佢歷年就出訪過超過100個國家以及地區。喺1975年,伊莉莎伯二世第一次訪港,呢次佢嘅四日行程當中就係到訪中環嘉咸街街市、摩士公園游泳池、愛民邨、並且喺已故前港督麥理浩陪同下欣賞煙花、花車巡遊等等。
至於第二次伊莉莎伯二世訪港,就係1986年與丈夫菲臘親王同行,當年行程就有前往沙田公屋隆亨邨探訪其中一個家庭、出席紅館舉行嘅大匯演,同場仲有張國榮、鍾鎮濤、張學友等歌手獻唱。
原圖嚟自網絡