相信唔少史友都明白一個道理，但凡書畫古董有價有市，市面上自然就會有造假嘅風氣盛行，呢一點放到明朝就更加誇張，事關當時甚至仲出現一個專門造假嘅作坊「蘇州片」，阿史今次就同大家講一講啦！
雖然話書畫造假嘅事跡歷朝歷代都有出現過，但要去明朝咁誇張就真係少之又少！要知道隨住經濟發展，明朝中後期奢風漸至，唔單止士大夫之間互相攀比，就連富商以至普通嘅百姓都要爭風。咁眼見普通百姓都跟風，士大夫以及富商就必然要用啲方法去表現自己嘅地位，於是就向奢侈商品、古書畫入手。之不過，真跡始終都係有限，而且價錢昂貴。但係，買畫嘅人唔等同識畫，於是喺呢個時候假書畫嘅出現就幫到唔少人喇！
喺明後期，唔少傳統文人就索性「棄儒就賈」，直接參與到書畫造假工作當中，喺明代書法家詹景鳳《東圖玄覽編》中仲有記錄一個專門造假嘅作坊「蘇州片」：「蘇州專諸巷，偽造書畫」，認真誇張！
而呢種風氣逐漸盛行之下，明代中後期書畫市場甚至變成「片縑朝出，午已見副本，有不十日，到處有之，凡十餘本者」嘅景象，真係諷刺！
原圖嚟自網絡