繼續同史友們介紹一啲古代嘅婚姻習俗，早排就同大家講完點解古代男人娶妻多數都係十三、十四歲同埋點解表哥會娶表妹，今次就同大家講講清代流行嘅「童養媳」。
所謂嘅「童養媳」其實就係指未成年嘅女兒被賣出到富貴人家當中，咁佢哋有機會會成為丫環、侍女，但喺清代最流行就係被賣為「童養媳」，喺成年之後就需要同新家庭嘅兒子結為夫婦。咁到底係咩因素促使呢種風氣喺清代盛行呢？
其中一個原因就係「窮」喇！喺女兒未成年之時趁早搵到婆家「童養」，確實係可以省去撫養女兒嘅費用，並且省去大筆嘅嫁妝花費。要知道喺清代嘅時候盛行「婚姻論財」、「厚嫁」風氣，萬一出嫁嘅女子嫁妝唔夠豐富，其實就算嫁到都好難過上好日子。相反，即使新娘外貌、德行一般，但嫁妝豐厚反而可以搵到理想夫婿。
亦都係因為呢種厚嫁之風，令到唔少窮人以及普通人家提早將女兒賣出「童養」以減輕家庭壓力，更嚴重嘅情況其實唔少窮人會將剛出世嘅女嬰「溺殺」嚟逃避厚嫁之風，真係相當恐怖！
原圖嚟自網絡