今日有單都幾得人驚嘅新聞，就係一名食肆男東主因涉及私人債務，日前疑遭歹徒綁架，更慘遭撕票，見到呢單新聞都令人相當唔安樂。
响以往，香港都發生唔少綁架案，有啲更係悲劇收場，當中較為轟動嘅就有地產商人王德輝綁架案。據了解，1990年4月10日，王德輝响跑馬地馬會會所打完波之後，响返屋企途中被人綁架，之後綁匪响報章落廣告，叫王德輝老婆龔如心同佢哋聯絡，結果綁匪要求十億美元贖金。龔如心亦响於4月25日將2.6億港元存入一個由綁匪指定嘅銀行戶口裡面，不過王德輝仍然無被釋放。雖然後嚟大部分綁匪落網，但王德輝就好似人間蒸發咁，綁匪就話王德輝响1990年4月13日被香港遠洋漁船載至公海之後推咗佢落公海，自此下落不明。而香港高等法院亦响1999年9月，宣佈王德輝响法律上已經死亡。
其實王德輝早响1983年已經試過被人綁架，當時王德輝同佢太太龔如心响離開山頂寓所返公司途中，被幾名綁匪綁架，更被勒索1億美元，王德輝就被綁匪挾持，龔如心就被釋放同贖款救人。後嚟龔如心依綁匪指示將100萬美元現金匯到台灣，但呢次綁架事件就成功被警方偵破，綁匪全數被捕，王德輝因此獲救。
不過，偵破呢次綁架案嘅警長，竟然成為咗1990年王德輝綁架案嘅主腦。
原圖嚟自網絡