繼續同史友們介紹我國最新嘅考古發現,提到黃金面具可能唔少史友們都會即時想起早前三星堆發掘出嚟巨型金面具,之不過類似嘅發現當然唔止一個,而古人製造金面具陪葬到底又有咩用意呢?阿史今次就同大家講一講啦!
近日我國河南鄭州嘅考古研究團隊就喺當地發現到一個商代貴族墓葬區,據了解呢個墓葬原本係處於基鄭州市東大街南、紫荊山路東、書院街北區域,但喺事前勘探就意外發現遺址。
經過考古發掘以及研究後,考古團隊就喺呢個高級貴族墓當中發現到隨葬品200幾件,當中除咗有銅器、玉器、箭鏃、貝幣之外,仲有少量嘅金器。而喺隨葬文物當中最值得留意嘅係一副「金覆面」。同以往三星堆出土嘅金面具唔同,今次發現嘅「金覆面」係覆蓋晒成張人臉,而之所以咁做係因為古人深信咁樣先可以令到「精氣神」唔散,亦都係印證早喺商代就有呢種「金身不敗」嘅講法。
原圖嚟自網絡