今日係九一八事變嘅91周年，喺呢個無數國人都會感到傷痛嘅日子當中，就有一件頗具象徵意義嘅事發生，就係我國抗日英雄趙一曼留學檔案被徵集回國。
提到趙一曼呢個名，相信唔少史友都唔會覺得陌生，原名李坤泰嘅趙一曼出生喺四川一個富裕家庭。本來不愁衣食嘅佢為咗加入革命事業，毅然另取姓名。早喺1925年「五卅」運動一周年之時，趙一曼就已經組織學生抵制英國煤油輪船靠攏宜賓碼頭，發起全城罷工、罷市、罷課。其後，佢就考進武漢黃埔軍校並且仲被派到蘇聯進入莫斯科中山大學學習。
喺國難當前，已經生有一子嘅趙一曼就交托孩子畀家人照顧，其後自己就前往東北進行抗日活動。1935年，佢就擔任東北抗日聯軍第3軍1師2團政治委員，同年就因為受傷被俘。日軍眼見佢有利用價值，就將佢關押喺醫院治療，雖然曾經一度逃脫，但面對日本關東軍拷打，趙一曼始終頑強不屈。
趙一曼嘅英雄事跡多年嚟感動唔少國人，而今次事隔90幾年被發現嘅檔案，正正就係趙一曼喺1927年9月至1928年11月蘇聯莫斯科中山大學留學期間，所寫下嘅學生黨的工作經驗調查表以及寫畀莫斯科中山大學領導嘅信件。
原圖嚟自網絡